ვებ-გვერდზე მიმდინარეობს ტექნიკური სამუშაოები
გიორგი კვირიკაშვილი დალია გრიბაუსკაიტეს შეხვდა
2016-02-13 17:03:49 · ამობეჭდვა

მიუნხენის უსაფრთხოების კონფერენციის ფარგლებში, საქართველოს პრემიერ-მინისტრი გიორგი კვირიკაშვილი ლიტვის პრეზიდენტს, დალია გრიბაუსკაიტეს შეხვდა.
საქართველოს მთავრობის ადმინისტრაციის პრესსამსახურის ინფორმაციით, გრძელდება საქართველოს პრემიერ-მინისტრის გიორგი კვირიკაშვილის ვიზიტი გერმანიის ფედერაციულ რესპუბლიკაში.

მიუნხენის უსაფრთხოების კონფერენციის ფარგლებში, გიორგი კვირიკაშვილი ლიტვის პრეზიდენტს, დალია გრიბაუსკაიტეს შეხვდა.მხარეებმა ორი ქვეყნის პარტნიორული ურთიერთობების საკითხებზე და თანამშრომლობის გაღრმავების პერსპექტივებზე იმსჯელეს. ყურადღება გამახვილდა საქართველოსა და ლიტვას შორის არსებულ სავაჭრო-ეკონომიკურ და საინვესტიციო პოტენციალზე.

"ხაზი გაესვა გააქტიურებულ ეკონომიკურ ურთიერთობებს და გამოითქვა იმედი, რომ საქართველო-ლიტვის მთავრობათაშორისი ეკონომიკური კომისიის მუშაობა თანამშრომლობის კიდევ უფრო განვითარებას ხელს შეუწყობს. შეხვედრაზე საუბარი შეეხო ქვეყანაში მიმდინარე დემოკრატიულ რეფორმებს, ევროპული და ევროატლანტიკური ინტეგრაციის საკითხებს და ევროკავშირთან ვიზების ლიბერალიზაციის პროცესს. აღინიშნა ამ მიმართულებით მიღწეული პროგრესი", _ აცხადებენ პრესსამსახურში.

მათივე თქმით, საქართველოს პრემიერ-მინისტრმა და ლიტვის პრეზიდენტმა რეგიონის უსაფრთხოების თემებზე იმსჯელეს. ლიტვის პრეზიდენტმა კიდევ ერთხელ დაადასტურა მხარდაჭერა ქართველი ხალხის ევროპულ არჩევანისა და საქართველოს ტერიტორიული მთლიანობისა და სუვერენიტეტისადმი.







გაზიარება და მოწონება