„ნაციონალური მოძრაობა“ მოქალაქეთა აღრიცხვას იწყებს, ვინც ვაუჩერი და კომპენსაცია ვერ მიიღო
ამობეჭდვა · 2013-09-26 17:57:24 · 1 ნახვა

„ვინც ჩათვლიან, რომ ეკუთვნოდათ და ვერ მიიღეს კომპენსაცია ან სასოფლო–სამეურნეო ბარათები, შეუძლიათ მიმართონ ჩვენს ადგილობრივ ოფისებს, სადაც მიღებული აქვთ დავალება, რომ ყველა ასეთი ადამიანი აღრიცხონ და შესაბამისად, ამის მიხედვით შედგება საბოლოო სიები“, – განუცხადა კახეთის საინფორმაციო ცენტრს „ნაციონალური მოძრაობიდან“ პრეზიდენტობის კანდიდატმა დავით ბაქრაძემ.

მისივე თქმით, ეს არის ნებაყოფლობითი პროცესი. დავით ბაქრაძის განმარტებით, საპარლამენტო უმცირესობა მომავალი წლის ბიუჯეტის დაგეგმვის დროს, იმ ადამიანებისთვის თანხის ანაზღაურებას მოითხოვს, რომლებიც სტიქიით დაზარალდნენ და კომპენსაცია არ აუღიათ ან სასოფლო სამეურნეო ბარათი გარკვეული მიზეზების გამო ვერ მიიღეს.

„ძალიან ბევრ ასეთ შეხვედრაზე ჩნდება, რომ მოსახლეობის დიდმა ნაწილმა ვერ მიიღო სასოფლო–სამეურნეო ვაუჩერები. ბარათების განაწილება მოხდა არასწორად და ასეთ შეხვედრებზე მოდის ძალიან ბევრი ადამიანი, რომლებიც ჩივიან, რომ ეკუთვნოდათ და ვერ მიიღეს ეს ბარათები. ისევე, როგორც ძალიან ბევრი ადამიანი ჩივის სტიქიის კომპენსაციებთან დაკავშირებით, რომ განაწილდა არასწორად და ვერ მიიღო იმ ხალხმა, ვისაც ეკუთვნოდა. ამიტომ, ჩვენ ვთავაზობთ ყველა ასეთ ადამიანს, გაიაროს აღრიცხვა. „ნაციონალური მოძრაობის“ ადგილობრივ ოფისებში ჩვენ შევადგენთ სიებს, გამოვიყვანთ საბოლოო ხარჯთაღრიცხვას და მომავალი წლის ბიუჯეტის განხილვის დროს პარლამენტში, საპარლამენტო უმცირესობა დააყენებს საკითხს, რომ ბიუჯეტში გათვალისწინებული იქნეს დამატებითი თანხა და ყველა იმ ადამიანმა, რომელსაც ეკუთვნოდა სასოფლო–სამეურნეო ბარათი ან სტიქიის კომპენსაცია და სხვადასხვა მიზეზის გამო ვერ მიიღო ეს თანხა, უკვე მომავალ წელს ბიუჯეტში გამოყოფილი თანხიდან აუნაზღაურდეთ ზარალი და მიიღონ ის რაც მათ ეკუთვნოდათ,“– განუცხადა კახეთის საინფორმაციო ცენტრს დავით ბაქრაძემ.

კახეთში სასოფლო – სამეურნეო ბარათი რამდენიმე ათასმა ადამიანმა ვერ მიიღო, რის გამოც ისინი უკმაყოფილებას გამოთქვამენ პრეზიდენტობის სხვადასხვა კანდიდატებთან შეხვედრისას.

სოფლის მეურნეობის სამინისტროს ინფორმაციით, იმ ადამიანებმა, ვინც „მცირემიწიან ფერმერთა საგაზაფხულო სამუშაოების ხელშეწყობის პროექტის“ ფარგლებში სასოფლო – სამეურნეო ბარათები აქამდე ვერ მიიღეს, ვაუჩერებს ვეღარ მიიღებენ.