თელავის გამგებელი - სტალინის ძეგლის დემონტაჟი უახლოეს დღეებში მოხდება
ამობეჭდვა · 2013-09-26 18:41:49 · 1 ნახვა

თელავის მუნიციპალიტეტის გამგებლის გივი მეტრეველის განცხადებით, თელავში, მეორე მსოფლიო ომის მემორიალთან აღმართული სტალინის ძეგლის დემონტაჟი რამდენიმე დღეში, მას შემდეგ მოხდება, რაც გადაწყდება, სად უნდა დასაწყობდეს ძეგლი.

„ძეგლის ასაღებად საჭირო ყველა პროცედურა უკვე გავლილია. ერთადერთი საკითხი, რაც გადასაწყვეტია ის არის, რომ ჯერ არ ვიცით სად უნდა დასაწყობდეს ძეგლი. ამას როგორც კი გადავწყვეტთ, მაშინვე მოხდება მისი დემონტაჟი. სავარაუდოდ, უახლოეს დღეებში გადაწყდება ეს საკითხი. ადრე სად ინახებოდა ეს ძეგლი არვიცი, მაგრამ როგორც ჩანს, უსაფრთხო ადგილზე არ იყო“, - განუცხადა კახეთის საინფორმაციო ცენტრს გივი მეტრეველმა.

შეგახსენებთ, 1 სექტემბერს, თელავში, ზუზუმბოზე, სტალინის ძეგლი საზეიმო ვითარებაში გახსნეს. კახეთის საინფორმაციო ცენტრმა გაარკვია, რომ საზოგადოება „სტალინს“, თელავში, შინმოუსვლელთა მემორიალთან სტალინის ძეგლის განთავსების ნებართვა თელავის გამგეობამ 2013 წლის 18 აპრილს მისცა. 5 სექტემბერს, თელავის მუნიციპალიტეტის გამგეობამ სტალინის ძეგლის დემონტაჟის ბრძანება გასცა, საზოგადოება „სტალინს“ ძეგლის დემონტაჟი საკუთარი სახსრებით 5 დღის ვადაში უნდა მოეხდინა, თუმცა „სტალინელებმა“ ძეგლის დემონტაჟზე უარი განაცხადეს. თელავის მუნიციპალიტეტის საკრებულოს თავმჯდომარის დიმიტრი ბოჭორიძის განცხადებით, სტალინის ძეგლის დემონტაჟი ყველა შემთხვევაში მოხდება, შემდეგ კი საზოგადოება „სტალინს“ შეუძლია საკრებულოს ძეგლის დადგმის შესახებ ხელახალი ნებართვისთვის მიმართოს.